Info Spendesammelaktioun | UNICEF Luxembourg

Tëscht dem 07. an 12. Oktober 2024 si Mataarbechter vun UNICEF Luxembourg zu Réimech ënnerwee fir hir Spendesammelaktioun.

D’Mataarbechter sinn un hirer Kleedung, de Faarwe vun der UNICEF an un den Déngschtausweiser ze erkennen. Si huele kee Boergeld un, d’finanziell Ënnerstëtzung gëtt iwwert en Tablet bestätegt a geet iwwert en Ordre permanent direkt vun Ärem Bankkonto of.

Ännerung vum Drénkwaasserhärtegrad

Zanter Enn September 2024 kritt d’Stad Réimech kee Mëschwaasser méi. D’Drénkwaasser kréie mir elo just nach vum SEBES. D’Waasserhärt geet elo vu virdru 25°f (f° = franséischen Härtegrad) op ongeféier 12°f erof an dofir braucht Dir fir dat Waasser och keen zousätzlecht Traitement méi bei Iech doheem.

Falls Dir eng Waasseropbereedungsanlag hutt, huelt w.e.g. Récksprooch mat Ärem Installateur fir dës eventuell nei anzestellen.

Reewaasser clever notzen

Reewaasser notzen hëlleft net nëmmen, wäertvollt Drénkwaasser ze spueren, mee reduzéiert beispillsweis och d’Belaaschtung vun Ofwaassersystemer. Clever agesat ka Reewaasser fir d’Bewässerung vum Gaart, fir d’Toilette ze spullen oder fir d’Autoen ze wäschen, respektiv soss am Baussenberäich agesat ginn, wat d’Ëmwelt an de Portemonni schount. D’Ëmweltberodung Lëtzebuerg (EBL) huet dozou eng Inforgrafie erstallt: EBL Infografik_Reewaasser

Sun & Wind | Nei Luedstatioun beim Centre visit Remich

De Modell Sun & Wind ass eng netzonofhängeg Luedstatioun. Duerch en integréierte Solarmodul an eng effizient Wandturbinn kann dës Luedstatioun onofhängeg vun de Wiederkonditiounen Strom produzéieren a späicheren.

D’Benotzen ass ganz einfach:

  • dréckt op de grénge Knäppchen🟢
  •  soubal déi gréng Luucht ugeet kënnt Dir 1 Stonn laang Är Geräter gratis lueden
     

ℹ️ lueden iwwer normale Stecker oder USB-Uschloss méiglech

D’Gemeng ass zou vum 19.-22.07.2024 inclus

Mir sinn um Plënneren!

Fir d’Dauer vun de Renovéierungsaarbechten vum aktuellen Gemengenhaus plënneren d’Servicer vun der Stad Réimech 50 m méi wäit op d’Nummer 6, Rue Enz (virdrun BIL).

Dofir bleiwen all ons Servicer vum 19. – 22. Juli inclus zou.

Den 23. Juli 2024 si mir wéi gewinnt op der neier Adress fir Iech do !

Net fidderen weg!

Mir brauchen Är Hëllef!

Ägyptesch Nilgäns sinn eng invasiv Vullenaart a stellen eng Gefor fir eis heemesch Vullenaarten duer well si sech ouni natierlech Feinden zu Lëtzebuerg onkontrolléiert verbreeden kënnen.
‼️ Et ass immens wichteg, datt dir d‘Nilgänsen net fiddert! Wann dir en Nascht mat Eeër fannt, da kënnt dir gären de Standuert an eng Foto un info@neobiota.lu schécke.
 
📌Mir wëllen Iech awer och drop opmierksam maachen, dass et allgemeng verbueden ass Waasservigel an Dauwen zu Réimech ze fidderen.